كتبت: فاطمة الشناوي
وجه المطرب والمخرج أحمد ثروت نجل الفنان محمد ثروت، رسالة شكر لوالده، من داخل المستشفى المتحجز بها، بعد تعرضه لوعكة صحية شديدة، خلال الفترة القليلة الماضية.
ونشر أحمد ثروت صورة تجمعه مع والده عبر صفحته بموقع التواصل الإجتماعي “فيس بوك” وعلق قائلا: “الصورة دي قبل ما أتنقل لمستشفى في ألمانيا ويتمنع عني الزيارات، خدتها عشان أقولك أنا تعبتك جامد وأتمنى في يوم ما أخلف إن شاء الله أكون أب زيك أو حتى شبهك في أي حاجة بتعملها من قلبك مع اللي حواليك”.
وأضاف أحمد ثروت: “فعلًا العمر ما زادك إلا عظمة، بحبك وربنا يخليك ليا على التعب اللي تعبته معايا ويديك الصحة ونفضل في ظهر بعض كتف في كتف، وكلها فترة إن شاء الله وأجي اقف جنبك يا أستاذ”.
كما حرص المطرب تامر حسني على تقديم الدعم والمساندة للمطرب أحمد ثروت نجل المطرب محمد ثروت، وذلك بعد إصابته بمرض مناعي نادر والذي يُدعى بـ متلازمة الميلر فيشر، مؤكدًا أنه مؤمن بـ الاختبار الذي يمر به.
ونشر تامر حسني مؤخرًا صورة للمطرب أحمد ثروت عبر حسابه الشخصي على انستجرام، وعلق: أحمد ثروت صديقي ونجل الفنان والمطرب الكبير الغالي محمد ثروت، تقبل محنة كبيرة من ربنا بمنتهي الحب والإيمان، وهي أنه يصاب بمرض نادر يؤثر على رجله وميمشيش، وكان ساعتها بيحضر لـ زواجه.
وأضاف: وأثناء حديثي معه قلت له أنا كنت بكلمك عشان أهون عليك والحقيقة لاقيته مش محتاج، وهو من إيمانه بقضاء ربنا مهون على نفسه، ونفسيته في أعلى درجات الرضا وبيهزر ومبسوط، وقولت له ممكن تحول المحنة إلى منحة، وبالفعل قالي إنه بيعمل ده، وفاهم الاختبار كويس، وهينجح فيه وهيخف ويمشي على رجله تاني.
وفضل يحكي طول المكالمة عن حب أسرته واهتمامهم بيه وإخلاص خطيبته وقد ايه الموقف بين معدنها الأصيل وازاي بتسانذه وبتسهر على رحته طول الوقت، انا كمان بشكرهم وبشكرها جدا وبحييها على قلبها وتربيتها الأصيلة.
ربنا يشفيك يا أحمد ويفرح قلبك بقدر ثقتك العظيمة في ربنا، الثقة العظيمة الي انا شوفتها النهاردة وافرح معاك في فرحك قريب ان شاء الله، ادعوله معايا يا شباب ربنا يشفيه ويشفي كل مريض”.
