أكد الفنان باسم سمرة أنه لم يتسرع في اتهامه للفنان أحمد السقا أنه تسبب في حذف مشاهد له في فيلم “إبراهيم الأبيض”.
وقال باسم سمرة خلال لقائه في برنامج “حبر سري” من تقديم أسماء إبراهيم ويعرض عبر قناة “القاهرة والناس”: طبعا المخرج هو رب العمل وبيكون تحت إشرافه، لكن أنا لسه عند موقفي ومتسرعتش، لأنهم عملولي أزمة، أنا كنت بعمل مشاهد محدش يقدر يعملها وخطرة وبسبب الموضوع دا بقيت أفكر كتير أقدمها تاني ولا لأ.
أنت بتخاطر بحياتك وبنفسك وفي النهاية المشاهد تتشال ومش عارف علشان إيه، كان في استهانة، أنا بحب أحمد السقا ومعنديش مشاكل معاه ويشكر أنه طلع قال أنه ملوش علاقة بحذف المشاهد، أنا فهمت قصده لكن المهم هو والمخرج يكونوا فهموا اللي حصل.
أوضح باسم أن شخصيته في فيلم “الجزيرة” تعرضت للقتل حتى لا يظهر في الجزء الثاني، قائلا: “الجزيرة كان هيبقى في جزء تاني، وأنا لو موجود كان كلهم هيقعدوا في البيت،أنا أشطر واحد “.
وأكد باسم سمرة أن الأمر تكرر في فيلم “إبراهيم الأبيض”، موضحا: ” شالوا دوري تقريبا، عشان وجودي كان هيعمل قلق، أنا عملت دور أكتر من رائع، وبنط من الدور السابع وكان في مخاطرة كبيرة”.
